- Авторы: Елена ВЕБЕР
Қарағанды облысындағы төрт қалада балабақшалар жабылады
26 наурыздан бастап Қарағанды облысындағы төрт қалада – Қарағанды, Теміртау, Жезқазған, Балқашта коронавирустың тарауын алдын алу үшін жарияланған карантинге байланысты балабақшалар жабылады. Бұл туралы 21 наурызда облыстық білім басқарамасының жетекшісі Есенғазы Иманғалив онлайн брифинг кезінде хабарлады.
Балабақшалар жұмысы қашан жалғасатыны белгісіз. Жергілікті билік өкілдерінің сөзінше, балабақша жұмысы аймақтағы эпидемия ахуалына байланысты болмақ.
Онлайн-брифинг кезінде Қарағанды облысы денсаулық сақтау басқармасының бастығы Ержан Нұрлыбаев мессенджерлерде тараған “Теміртауда екі адам Covid-19 дертіне шалдығыпты” деген ақпаратты жоққа шығарды.
21 наурыздағы дерек бойынша, Қарағанды облысында 124 адам ауруханада карантинде, 31 адам үй карантинінде жатыр. Нұрлыбаев брифинг кезінде жұртты мереке күндері үйде қалуға, көшеге шықпауға шақырды.
Қарағанды облысында 48 және 49 жастағы екі адамнан вирус табылған. Жергілікті биліктің дерегінше, олар 18 наурызда Минск – Нұр-Сұлтан рейсмен ұшып келген. Олар Қарағанды облысының тұрғындары емес. Билік Нұр-Сұлтанға адамдарды карантинге жатқызу қиын болғандықтан ұшақ Қарағандыға қонғанын мәлімдеді. Денсаулық сақтау басқармасының хабарлауынша, екі науқас қазір инфекциялық бөлімшеде жатыр. Жағдайы орташа.
Облыста коронавирус табылған соң қауіпсіздік шаралары күшейді. 20 наурыздан бастап ірі сауда орындары мен ойын-сауық орталықтары жабылды. Азық-түлік дүкендері мен дәріханаларда кезекте тек бес адам тұруы тиіс.
Нұр-Сұлтанда ХҚКО жұмысын тоқтатты
21 наурыздан 16 сәуірге дейін, карантин уақытында, Нұр-Сұлтан қаласындағы Халыққа қызмет көрсету орталықтары (ХҚКО) және “Азаматтарға арналған үкімет” мемлекеттік корпорациясының арнайы халыққа қызмет көрсету орталықтары жұмыс істемейді. Бұл туралы қала әкімдігі хабарлады.
Шешімді қалада коронавирустың тарауын тоқтату бойынша жедел штаб қабылдаған.
Азаматтар құжаттарды “Электронды үкімет” порталы арқылы ала алады. Контакт орталықтары жұртқа “Электронды үкімет” порталы арқылы жұмыс істеу бойынша кеңес береді.
Нұр-Сұлтанда тағы бір адамнан вирус табылды. Елде 54 адам дертке шалдықты
21 наурыз Алматы уақыты бойынша 22.30-да Қазақстан денсаулық сақтау министрлігі Нұр-Сұлтанда тағы бір адамнан коронавирус табылғанын хабарлады.
Қазіргі дерекке сай, Қазақстанда барлығы 54 адамға вирус жұқты. Алматыда - 22 адам, Нұр-Сұлтанда - 29 адам, Қарағандыда - 2 адам, Алматы облысында 1 адам емделіп жатыр.
Еуропадағы жағдай. Италияда бір күнде 793 адам көз жұмды
- Италияда коронавирустан көз жұмғандар саны тағы да өсті. Кейінгі 24 сағатта бүл елде Covid-19 дертінен 793 адам қаза болды. Ал бір күнде 6500 вирус жұқтырды. Қазір Италияда 53500 адам дертке шалдыққан.
- Босния мен Финляндияда коронавирустан алғашқы өлім тіркелді. Екі елде де бір-бір адам қаза болды.
- Нидерланд елінде бір күнде 637 адамнан вирус табылып, дертке шалдыққандар саны 3630-дан асты. Кейінгі 24 сағатта 30 адам көз жұмды. Бұл елде 136 адам дерттен опат болды.
- Швейцарияда 6100 адам дертке шалдықты. 56 адам қайтыс болды. Чехияда Аурудан жазылғандар арасында алты жасар бала бар.
ПІКІРЛЕР