Қазақстанда коронавирус пен пневмониядан тағы 9 адам қайтыс болды
15 қарашада Қазақстанда 48 адамнан коронавирус пневмониясы анықталды, 24 адам жазылды, өткен тәулікте пневмонияның осы түрінен 2 адам қайтыс болды.
Қазақстан билігі 1 тамыздан бастап коронавирусқа ұқсас пневмонияға бөлек код беріп, пневмонияның сол түріне шалдыққандарды бөлек есептеп келеді. Содан бері 40 197 адамнан коронавирус пневмониясы анықталған, 420 адам қайтыс болған, 29 580 адам жазылған.
Бейсенбі күні коронавирус жұққаны тестпен расталғандар арасында 7 адам өлімі тіркелген, наурыз айынан бері коронавирустан қайтыс болғандар саны 1945 адамға жетті. Елде коронавирус жұққаны тестпен дәлелденген 121 051 адам бар: 109 944-і жазылған.
Қазір 9 162 адам коронавирустан емделіп жатыр, 3 041-і - ауруханада. 217 адамның жағдайы - ауыр, 22 адамның жағдайы - өте ауыр, 23 адам жасанды тыныс алу аппаратына қосылған.
Қазақстанның Covid бойынша ресми статистикасына коронавирус жұққан бірақ арнайы комиссия "Covid-тен емес - ілеспе аурудан қайтыс болды" деп шешім шығарған жүздеген адам өлімі енгізілмеген. Соңғы айларда өткен жылдармен салыстырғанда адам өлімі көп тіркелді.
Қазақстанда өткен тәулікте 588 адамнан коронавирус анықталды, 301 адам жазылды
15 қараша күні Қазақстанда коронавирус жұқтырғаны Covid тестімен (ПТР) расталған 588 науқас тіркелді. Ең көп науқас Шығыс Қазақстан облысында (197) тіркелген. Бір күнде 301 адам жазылды. Денсаулық сақтау министрлігінің 16 қараша таңертең таратқан хабарламасында осындай ақпарат жазылған.
Солтүстік Қазақстан облысында - 57, Қостанай облысында - 51, Павлодар облысында - 49, Нұр-Сұлтанда - 44, Батыс Қазақстан облысы мен Алматы қаласында әрқайсысында 42 адамнан коронавирус инфекциясы табылған. Қызылорда және Маңғыстау облыстарында жексенбі күні бірде-бір науқас тіркелмеген.
Елде наурыз айынан бері вирус жұқтырғаны ПТР тестімен расталғандар 121 051 адамға жетті: 109 мыңнан астамы жазылған. 8 мыңға жуығы емделіп жатыр, 1924-і қайтыс болған. Covid өлімі статистикасына коронавирус жұқтырғаны расталған бірақ "ілеспе аурудан қайтыс болды" деген жүздеген адам кірмейді.
Covid жөніндегі ұлттық статистикаға есебі 1 тамыздан бері жүргізіліп келе жатқан коронавирус пневмониясы статистикасы (коронавирустың ПТР тестімен расталмаған кейстері) да қосылмаған. 15 қарашадағы дерек бойынша, пневмонияның бұл түрі тамыздан басынан бері 40 149 адамнан анықталған, 418-і қайтыс болған.
Өткен тәулікте (14 қараша) Қазақстанда Covid пен оған ұқсас пневмониямен ауырған 856 адам тіркелді. Олардың 630-ынан ПТР тесті нәтижесінде коронавирус анықталса, қалған 226 кісі "коронавирустық пневмония" дертіне шалдыққан. Бір тәулік ішінде Covid-тен жеті адам, "коронавирус пневмониясынан" екі адам көз жұмды.
Сөйтіп, Қазақстанда коронавирус инфекциясымен және соған ұқсас пневмониямен ауырғандар саны 160 мыңнан асты.
Бір тәулікте коронавирустан 368 адам жазылып шыққан.
Аймақтар бойынша қарасақ, індет әдеттегідей шығыс және солтүстік өңірлерде өршіп тұр. Коронавирус инфекциясы тест арқылы анықталғандардың аймақтар бойынша көрсеткіштері:
- Нұр-Сұлтан – 48;
- Алматы – 45;
- Шымкент – 5;
- Ақмола облысы – 34;
- Ақтөбе облысы – 3;
- Алматы облысы– 28;
- Атырау облысы– 12;
- Шығыс Қазақстан облысы – 236;
- Жамбыл облысы – 4;
- Батыс Қазақстан облысы – 40;
- Қарағанды облысы – 17;
- Қостанай облысы – 52;
- Қызылорда облысы – 0;
- Маңғыстау облысы – 1;
- Павлодар облысы – 50;
- Солтүстік Қазақстан облысы – 54;
- Түркістан облысы – 1.
Солтүстік аймақтарда коронавирус жұқтырғандардың күрт өсуіне Ресеймен ортақ шекара себеп дейді билік органдары. Шекарадағы тексеру кезінде Ресейден келгендердің Covid-ке шалдыққаны көп анықталады.
— Дәл осы аймақтарда жүріс-тұрыс көбейіп, соған қатысты сұрақтар туындады. Сондықтан әрі-бері көші-қонды шектеу және мемлекеттік шекарада бақылауды күшейту бойынша тиісті шаралар қабылдадық. Шекарадан өтіп жатқан біздің азаматтар арасында [коронавирус] көп тіркеліп жатқан жағдайлар бар. [мемлекеттік шекарадан] өту кезіндегі шекаралық аймақта [Covid жұқтырған] 361 адам анықталды. Олардың 350-і – Ресейден келгендер, – деді Денсаулық сақтау вице-министрі, бас мемлекеттік санитарлық дәрігер Ерлан Қиясов Орталық коммуникация қызметінде өткен брифингте Азаттық сауалына берген жауабында,
Қиясовтың айтуынша, солтүстік және шығыс аудандарда ПТР тестпен қамту көлемі басқа аймақтардан жоғары. Ауа температурасы оңтүстік аудандарға қарағанда анағұрлым төмен болғандықтан, солтүстікте вирустық респираторлық инфекцияның көбірек болуы да осының бір себебі.
Covid тесті растаған дерек: Қазақстанда өткен тәулікте 704 науқас тіркелді
13 қараша күні Қазақстанда коронавирус жұқтырғаны Covid тестімен (ПТР) расталған 704 науқас тіркелді. Оның 35 пайызы Шығыс Қазақстан облысының үлесінде. Бұл туралы Қазақстан денсаулық сақтау министрлігі хабарлады.
Аймақтар бойынша, әдеттегідей Шығыс Қазақстан облысы көш бастап тұр. Онда бір күн ішінде 248 науқас анықталды. Облыстың тәулік көрсеткіші бойынша өзге облыстардан алда келе жатқанына екі айдан асты. Қазір облыста Covid жұқтырғандардың жалпы саны 13 272 адамға жетіп отыр. Бұл – Алматы (15166) және Нұр-Сұлтан (15110) қалаларынан кейінгі үшінші нәтиже.
ШҚО-дан кейінгі орындарда Нұр-Сұлтан және Алматы қалалары. Онда сәйкесінше 86 және 77 науқас анықталған. Қостанай облысында 52, Солтүстік Қазақстан облысында 51, Павлодар облысында 49 науқас тіркелді. Ақмола және Батыс Қазақстан облыстарында науқас саны тең – 35.
Ең төменгі көрсеткіштер Қызылорда (2), Маңғыстау (1) және Түркістан (1) облыстарының үлесінде.
Елде вирус жұқтырғаны ПТР тестімен расталғандар саны 119 833 адамға жетті. Оның 109 275-і жазылып шыққан. Сегіз мыңға жуығы емделіп жатыр, 1924-і қайтыс болған. Covid өлімі статистикасына коронавирус жұқтырғаны расталған бірақ "ілеспе аурудан қайтыс болды" деген жүздеген адам кірмейді.
Covid жөніндегі ұлттық статистикаға есебі 1 тамыздан бері жүргізіліп келе жатқан коронавирус пневмониясы статистикасы (коронавирустың ПТР тестімен расталмаған кейстері) кірмеген. 13 қарашадағы дерек бойынша, пневмонияның бұл түрі тамыздан басынан бері 39 724 адамнан анықталған, оның 415-і қайтыс болған.
ПІКІРЛЕР