Алматыдағы Кеңсай зиратында қоғам өкілдері оппозициялық саясаткер Заманбек Нұрқаділовті еске алды. Жиналғандар алдында журналист Рысбек Сәрсенбай, әнші Нұрғали Нүсіпжанов және басқалар сөйлеп, осыдан 9 жыл бұрын жұмбақ жағдайда қаза болған саясаткер жайлы естеліктер айтты. Кезінде мемлекеттік жоғары лауазымды қызметтерде істеген, өмірінің соңына қарай қазақ оппозициясы жетекшілерінің бірі болған Заманбек Нұрқаділов 2005 жылы қарашаның 12-сі күні Алматыдағы үйінде өлі күйінде табылған еді. Оның кеуде тұсына екі, басына бір оқ тигені анықталған. Ресми тергеу жүргізген билік «ол өзін-өзі өлтірген» деген қорытынды жасаған. Бірақ Қазақстан оппозициясының кейбір өкілдері Нұрқаділовтің қазасын әлі күнге дейін шындығы ашылмай келе жатқан «саяси кісі өлтіру оқиғасы» деп санайды. 12 қараша 2014 жыл.