Ақтөбе облысында Қобда ауылын су алды. Апат аймағына барған Азаттық тілшісі он шақты ғимарат құлағанын көрді. 100 шақты адам эвакуацияланған. Облыстың төтенше жағдайлар департаментінің "ешбір елді мекенді су баспайды" деген мәлімдемесінен бірер сағат өткен соң, тасқын басталған.
Мәжіліс және мәслихат сайлауына 13 күн ғана қалды. Дегенмен сайлауға түсетін кандидаттар саны әлі нақты белгісіз. Өйткені орталық сайлау комиссиясының тіркеуінен өткен кейбір азамат "салық декларациясын дұрыс толтырмады" деген желеумен кандидаттар қатарынан шығып қалып жатыр.
Алматыда бір топ жас жапон анимесін қазақ тіліне дубляждаумен айналысып жүр. Олар "қазақ тілін осылай әйгілегіміз келеді" дейді. Дубляж актерлері – 17-26 жастағы жастар. Топ жұмысқа керек қаржыны көрерменнен жинайды.
Біріккен Ұлттар Ұйымы Ресей әскерін Украинадан әкетуді талап ететін қарар қабылдады. Қазақстан әдеттегідей қалыс қалғандар қатарында. Бұл – Қазақстанның Ресейді айыптайтын резолюцияларға дауыс беруде төртінші рет қалыс қалуы. Бір жыл ішінде Ақорданың соғысқа қатысты ұстанымы қандай болды?
Алматы облысы Талғар ауданына қарасты Жалғамыс ауылының тұрғындары кейінгі 10 жылдан бері толарсақтан саз кешіп, тобығынан лайға батып жүр. Округ әкімдігі "асфальттың ауылы алыс екенін" айтады.
Қаңтар оқиғасынан кейін қылмыстық іс бойынша күдікке ілініп, үйқамақта отырған екі адам – Әйгерім Тілеужан мен Қосай Маханбаев сайлауға қатысуға рұқсат алды. Тілеужан мәжіліс, Маханбаев мәслихат депутаттығынан үмітті.
Наурыз мейрамы қарсаңында қазақстандық еріктілер "Қоржын" акциясын бастады. Олар бір жылдай уақыттан бері соғыс қажытқан халыққа гуманитарлық көмек жолдамақ. "Қоржын" ішінде қазақтың ұлттық тағамдары да бар.
7 ақпанда Тараз қаласында Қаңтар оқиғасына байланысты айыпталған тоғыз адамға үкім оқылды. Оның бесеуі – марқұм, төртеуі тірі. Төрт адам да айыпты мойындамады. Марқұмдардың туыстары сот әділ өткен жоқ дейді.
Қолындағы Қытай паспортын қидырып, Шыңжаңдағы тұрақты тіркеуін өшіру үшін қандастар Қытайдың Алматыдағы консулдығы алдында қонып жүр. Сөздерінше, кезек өте баяу жылжиды. Консулдық Азаттыққа жауап бермеді.
Алматыда бір топ адам Түркиядағы жер сілкінісінен зардап шеккен тұрғындарға арнап көрпе-жастық тігіп жатыр. Алдағы дүйсенбі күнге дейін екі мың көрпе, тағы екі мың матрац тігіп жөнелтпек.
Тараз қаласында былтыр Қаңтар оқиғасы кезінде оқ тиіп қаза тапқан Исатай Донбаев 46 жаста еді. Артында үш баласы мен бауырлары қалды. "Басына барып, дұға жасаудан басқа амал жоқ" деген әпкесі кейінгі бір жылда інісін ақтап алуға тырысып келеді.
23 қаңтарда Атырау қалалық сотында журналист Олеся Вертинскаяға жасалған шабуыл бойынша іс қарала бастады. Тілшіні соққыға жыққан 23 жастағы азамат бұзақылық бабымен айыпталып отыр. Вертинская бұл шабуылды кәсіби қызметімен байланыстырады.
Алматының аспанын кейінгі күндері түтін басып тұр. Бұған дейінгі көрсеткіш те жақсы емес. Бірақ экологтар кеше қалада ластану деңгейі 400 микрограмнан асып кеткенін айтады. Бұл әлемдік нормадан 15 есе көп.
19 қаңтарда журналист Вадим Борейко пәтерінің есігіне белгісіз біреулер желім жағып кеткенін хабарлады. Бұл — жыл басынан бері журналистерге жасалған бесінші шабуыл. Медиа өкілдері тәуелсіз тілшілерге қысым күшейгенін жазып, биліктен бейтарап тергеу талап етіп жатыр.
Павлодар облысы Екібастұз қаласының тұрғындары жылудың тағы азайып кеткенін айтып, шағымданып жатыр. Бір жарым ай бұрын апат болған жылу орталығынан проблема шыққанын станция өкілдері де растады. Жағдай қашан ретке келетіні белгісіз.
Бір топ қазақстандық ерікті соғыс жайлаған Украинаның алты қаласына киіз үй тігіп жатыр. Алғашқысы Буча қаласында бой көтерді. Еріктілер жобасы туралы ақпарат тараған тұста Мәскеу Астананы бұл бастама туралы мәлімдеме жасауға шақырды.
9 қаңтарда Алматыда бір топ адам белсенді Назым Табылдиеваны қолдап, полиция бөлімшесінің алдына жиналды. Олар Қаңтар құрбандарын еске алуға бармақ болған Табылдиеваны құзырлы орган өкілі "заңсыз ұстап, күш көрсетті" дейді.
Қаңтар оқиғасы кезінде қоғам назарын аударған қаланың бірі – Талдықорған. Мұнда экс-президент Нұрсұлтан Назарбаевтың ескерткіші құлады. Әскерилер атқан оқтан бейбіт тұрғындар қаза тапты. Абақтыда тергеушілер ұсталғандарды азаптап, арқаларына үтік басты.
Алматыда 5 қаңтар күні бір топ адам бір жыл бұрын дүрбелең кезінде қаза тапқандарды еске алды. Қала әкімдігі марқұмдардың рухына арнап мешіттерде ас берді. Алаңға жиналған азаматтық белсенділер қанды оқиғаның тергелуіне көңілдері толмайды.
Он жыл бұрын Арқанкергендегі қанды оқиғаға кінәлі деп танылып, түрмеде отырған Владислав Челах президентке хат жазды. Ол хатта "жасамаған қылмысы үшін" өмір бойына қамалғанын және шекара бекетіне шабуыл болғанын айтқан. Азаттық Челахтың атасымен де тілдесті.
Тағы
