- Авторы: Руслан МЕДЕЛБЕК
Украинадағы соғыстың алтыншы күні не болды? Қысқаша шолып шығыңыз.
- Ресей Киевтегі телемұнараға шабуыл жасап, кемі бес адам қаза тапты, бес адам жараланды. Ресей қорғаныс министрлігі "Ресейге қарсы ақпараттық шабуылды тоқтату үшін" Киевке шабуыл жасалатынын айтқан еді.
- БҰҰ есебінше, Украинада 24 ақпанда басталған соғыстан кемі 163 бейбіт тұрғын қаза тапқан, опат болғандар арасында 13 бала бар. Кемі 400 адам жараланған, олардың ішінде 26 бала бар.
- Женевада өтіп жатқан БҰҰ қарусыздану конференциясы кезінде Ресей сыртқы істер министрі Сергей Лавров видео байланыс арқылы сөйлей бастағанда Еуропа одағының өкілдері залдан шығып кетті.
- Украина президенті Владимир Зеленский Қырғызстандағы елші Валерий Жовтенко мен Грузиядағы елші Игорь Долговты кеңесу үшін кері шақырды. Ол Қырғызстан билігі "Украинаға қарсы агрессияны ақтағаны үшін" елшіні кері шақырып алғанын жеткізді. Зеленский Грузия билігі Украинаға ерікті түрде көмектескісі келгендерге мүмкіндік бермеді деп мәлімдеді.
- Еуропарламент Украинаның Еуропа одағына қосылу өтінішіне қолдау білдірді.
- Харьков қаласына шабуылдан кемі он адам қаза тапқан. Ондаған адам жараланған. Бұл туралы жергілікті билік хабарлады. Зеленский Харьковқа шабуылдаған Ресейді "террорист мемлекет" деп атады.
- Беларусь шекарасы жақтан ресейлік әскери техникалардың ұзын колоннасы Киевке қарай кетіп барады. Maxar компаниясы спутниктен түсірген суреттерді жариялап, колонна 65 шақырымға жететінін мәлімдеді.
- Украинадағы соғыста Ресейдің Краснояр өлкесі Астрахань облысының тумасы, қазақ Арман Нарынбаев қаза болған.
- Ресей әскері Украинаның оңтүстігіндегі Херсон қаласын құрсауға алып, қала сыртына блок-бекеттер орнатты. Бірақ қала Украина әскерилерінің бақылауында екені айтылды.
Киевтегі телемұнараға жасалған шабуылдан бес адам қаза тапты
Украинаның төтенше жағдайлар жөніндегі мемлекеттік қызметі Киевтегі телемұнараға жасалған шабуылдан кемі бес адам қаза тауып, бес адам зардап шеккенін мәлімдеді.
Шабуыл салдарынан Украинаның телеарналары істемей қалды. Олар хабарды ютуб каналдарында жалғастырып жатыр. Жақын арада украиналық телеарналар қосалқы аппаратқа қосылатыны хабарланды.
Бүгін түсте Ресей қорғаныс министрлігі "Ресейге қарсы ақпараттық шабуылды тоқтату үшін" Киевке шабуыл жасалатынын айтқан еді.
Киевтегі телемұнараға шабуыл жасалғаны хабарланды
Украина ішкі істер министрінің кеңесшісі Антон Геращенко ресейлік әскерилер Киевтегі телемұнараға шабуыл жасағанын хабарлады.
Интернетте тараған видеоларда мұнара құламағаны байқалады. Украиналық телеграм каналдар мұнара маңындағы аппараттар орналасқан ғимарат шабуылға ұшырағанын жазып жатыр.
Бүгін түсте Ресей қорғаныс министрлігі "Ресейге қарсы ақпараттық шабуылды тоқтату үшін" Киевке шабуыл жасалатынын хабарлаған.
БҰҰ: Украинада соғыс басталғалы кемі 163 бейбіт тұрғын опат болды
БҰҰ есебінше, Украинада 24 ақпанда басталған соғыстан кемі 163 бейбіт тұрғын қаза тапқан, опат болғандар арасында 13 бала бар. Бұл туралы БҰҰ адам құқығы жөніндегі жоғарғы комиссарының өкілі Элизабет Тросселге сілтеме жасап, Reuters агенттігі хабарлады.
Тросселдің сөзінше, кемі 400 адам жараланған, олардың ішінде 26 бала бар.
"Шынайы адам шығыны бұдан да көп болуы мүмкін" деді ол брифингте.
БҰҰ өкілі бейбіт тұрғындардың көбі әуеден жасалған шабуылдан және артиллериялық атқылаудан опат болып жатыр дейді.
Украина денсаулық сақтау министрі Виктор Ляшко 28 ақпанда 352 адамның қаза болғанын, олардың арасында 16 бала барын мәлімдеген. Ляшконың сөзінше, 2040 бейбіт тұрғын жараланған, арасында 45 бала бар.
24 ақпанда Ресей президенті Путинның бұйрығымен осы елдің әскерилері Украинаға басып кірген. Кремль мұны Украинаны "қарусыздандыру" және "ұлтшылдардан тазарту" үшін жасалған "арнайы операция" деп келеді. Ресей билігі бейбіт тұрғындарға оқ атпадық, тек әскери нысандарды ғана нысанаға алдық деген, бірақ қазірге дейін Киев, Харьков, Херсон және бірнеше қала шабуылға ұшырап, тұрғын үйлер қираған.
Гаагадағы Халықаралық қылмыстық сот Ресей Украинаға басып кіргенін соң "әскери және адамзатқа қарсы қылмыс" деген айыппен тергеу бастады.
АҚШ, ЕО және Батыс елдері Ресейге қатал санкциялар салған соң рубль құлдырап кетті.
ПІКІРЛЕР