Прокурор Козловты тоғыз жылға соттауды сұрады

Ақтауда өтіп жатқан Козлов, Сапарғали және Әминов ісі бойынша сотта жарыссөз басталды.

Жарыссөзге Астанаға жол жүруіне байланысты тек Ақжанат Әминовтің адвокаты Ардақ Батиева ғана қатыса алмады.

Жарыссөзде ең бірінші болып мемлекеттік айыптаушыларға сөз берілді.

"МЕМЛЕКЕТТІҢ ЖЕТІСТІГІН КӨРЕ АЛМАЙТЫН" "ТОП"

Айыпталушыларға қандай айып тағылғанын ұзақ тізбелеп шыққан прокурор сөзінің басында «Қазақстанның 20 жылда жеткен жетістігіне» тоқталып, «елбасының қиындықты табандылықпен еңсергенін» айтып өтті.

Прокурор «Мұхтар Әблязов құрған ұйымдасқан қылмыстық топтың» мемлекет іргесін шайқалтуды мақсат тұтқанын, осы «зымиян пиғылын жүзеге асыру үшін» қарапайым мұнайшыларды пайдаланғанын атап өтті.

– ...Ұйымдасқан қылмыстық топтың әрекеті алаңда бүлік ұйымдастырып, мұнайшыларды еш себепсіз ұстап тұру арқылы мемлекеттің іргесін шайқалтуға бағытталды..., - деді прокурор сотта.

Сотта бұған қоса, «2010 жылы Козловтың Жаңаөзенге сапары», "Владимир Козлов, Болат Атабаев және Әлия Тұрысбекова (Козловтың әйелі - ред.) арасындағы әңгіме" сияқты аудио-видео жазбалар сәт сайын көрсетіліп отырды.

Прокурор «Козловтың Әблязов бұйрықтарын» орындағанын, ал Әминов, Сақтағанов, т.б. өзге азаматтарға Козловтың өзі тапсырма беріп отырғанын үнемі қайталап, шегелеп айтып отырды.

Ол Жанболат Мамай мен Болат Атабаевтың істеген әрекеттеріне өкінетінін, қылмыстық кодекстің 65-ші бабы бойынша босап шыққанын да жеткізді.

- ...Сот тергеуі кезінде Козлов өзіне тағылған айыптарды мойындамай, мұны өзінің саяси әрекетін қуғындау деп бағалады. Бұған қоса, ол Жаңаөзенге барғанын, мұнайшылардың Еуропаға сапарын қаржыландырғанын, үнпарақтар мен газеттерді таратқанын жоққа шығармады. Айыпталушы Сапарғали өзіне тағылған айыптардың бір бөлігін мойындады. Процесс барысында сот пен халықтан кешірім сұрады. Айыпталушы Әминов кінәсін толық мойындап, өзінің әрекеттеріне өкінетінін білдірді, - деді прокурор сотта.

"ҚЫЛМЫС" ПЕН "ЖАЗА"

Сөзін аяқтаған прокурор Серік Сапарғалиды 164-бап бойынша кінәсіз деп тауып, тек 170-бап бойынша кінәлі деп тауып, оны төрт жылға соттауды сұрады.

Төрт баласы бар Ақжанат Әминовтің денсаулығы нашар екенін ескеріп, оны кәмпескелемей бес жылға соттауды сұрады.

Сот барысында Владимир Козловқа тағылған айыптар толық дәлелденгенін айтқан прокурор оған тоғыз жыл жаза тағайындауын өтінді.

- ...Айыпталушы Козловқа - 235-ші бап бойынша – 7 жыл, 164-ші бап бойынша – 9 жыл, 170-ші бап бойынша – 6 жыл, жалпы қосқанда 9 жыл беруді сұраймыз. Мүлкін кәмпескелеп, жалпы режимдегі колонияда жазасын өтегенін сұраймыз, - деді прокурор сотта.

Тамыз айында басталған сот процесінде істері қаралып жатқан тіркелмеген «Алға» партиясының жетекшісі Владимир Козлов, оппозициялық саясаткер Серік Сапарғали және қоғамдық белсенді Ақжанат Әминовқа «конституциялық құрылымды күшпен өзгертпек болды», «әлеуметтік араздық тудырды» және «қылмыстық топ құрды» деген айыптар тағылған.