Бұрын саяжай болған, қазір Астананың солтүстік жағалауындағы қымбат ауданға айналған жердегі үйлерін сүруге қарсы бес әйел тамыздың 6-сы күні аштық жариялаған еді. Олардың наразылық акциясы үйі бұзылады деп жоспарланған Алтын Шеруалиеваның үйінде өткен. Бірақ тамыздың 15-і күні оның үйін бұзып, наразы әйелдер мен оларды қолдаған көршілеріне сот шешімімен айыппұл салынған.
Әйелдер аштықты әлі жалғастыратынын мәлімдейді. Енді олардың акциясы аштық жариялаған әйелдердің бірінің қызы Әсел Иманованың үйінде – Шеруалиеваның бұзылған үйінің жанында өтіп жатыр.
– Шеруалиеваның үйін бұзған кездегі әрекеттерден кейін олардың бәрі аштықты тоқтатудан бас тартып отыр. Бұған қоса келесі күні оларды соттап, айыппұл салды, – дейді олардың өкілі Ольга Рубахова.
Бұдан бұрын «аштықты тоқтатамын» деп мәлімдеген аяғы ауыр Сандуғаш Серікбаева да наразылық акциясына қатысып отыр.
Наразы әйелдер Қазақстан президенті Нұрсұлтан Назарбаевтың қабылдауына кіргізуді және Астанадағы жерлерді «мемлекет қажетіне» деген уәжбен алу заңдылығын тексеруді талап етеді.
Олар «біздің жерімізді алып, әлдекімдерге бермек» дейді. Астана әкімдігі «бұрынғы саяжайлардағы жер телімдерін мемлекет қажетіне алумен айналысқан мемлекеттік органдардың әрекеті заңды» деп мәлімдейді. Бас прокуратураның мәлімдеуінше, «тексеру барысында ешқандай заң бұзушылық анықталмаған».
